मनोज जरांगे पाटील, अंजली दमानियांवर गुन्हा दाखल; अडचणी वाढण्याची शक्यता, कारण काय?

बीड : मस्साजोगचे सरपंच संतोष देशमुख (Santosh Deshmukh Case) यांची हत्या सध्या चर्चेत असून या प्रकरणाचा मास्टरमाइंड मंत्री धनंजय मुंडे (Dhananjay Munde) यांचे निकटवर्तीय वाल्मिक कराड (Walmik Karad) असल्याचा आरोप होत आहे. या प्रकरणावरून विरोधक मंत्री धनंजय मुंडे यांच्या राजीनाम्याची मागणी सातत्याने करत आहेत. संतोष देशमुख यांच्या हत्येच्या निषेधार्थ राज्यभरात विविध ठिकाणी निषेध मोर्चे काढले जात आहेत. परभणीतील मोर्चात मराठा आंदोलक मनोज जरांगे पाटील (Manoj Jarange Patil) यांनी मंत्री धनंजय मुंडे यांना इशारा दिला होता. सामाजिक कार्यकर्त्या अंजली दमानिया यांनी धनंजय मुंडे आणि पंकजा मुंडे (Pankaja Munde) यांच्या कार्यकर्त्यांकडून माझा मानसिक छळ होत असल्याचा आरोप केला होता. यानंतर मुंडे समर्थक आक्रमक झाल्याचे दिसून आले. आता मनोज जरांगे पाटील (Manoj Jarange Patil) आणि अंजली दमानिया (Anjali Damania) यांच्या विरोधात किनगाव पोलीस ठाण्यात तक्रार दाखल करण्यात आली आहे.

मसाजोगचे सरपंच संतोष देशमुख यांची क्रूर हत्या निषेधार्ह आहे. या प्रकरणातील दोषींवर कडक कारवाई झाली पाहिजे. मात्र, या घटनेचा आधार घेत मनोज जरांगे पाटील आणि अंजली दमानिया हे सातत्याने वंजारी समाजावर टीका करत आहेत. समाजाचे नेते धनंजय मुंडे आणि पंकजा मुंडे यांच्यावर आरोप करत आहेत. एवढेच नव्हे, तर समाजातील अधिकारी आणि कर्मचाऱ्यांना लक्ष करण्यात येत आहे. वंजारी समाजाबद्दल जातीय तेढ निर्माण होईल, अशा स्वरूपाची वक्तव्ये होत असल्याचा आरोप आहे. त्यामुळे कायदा आणि सुव्यवस्थेचा प्रश्न निर्माण होऊ शकतो, अशा स्वरूपाची तक्रार किशोर गंगारामजी मुंडे यांनी लातूर जिल्ह्यातील किनगाव पोलीस ठाण्यात दिली आहे. त्यानुसार, मनोज जरांगे पाटील आणि अंजली दमानिया यांच्या विरोधात किनगाव पोलीस ठाण्यात गुन्हा दाखल करण्यात आला आहे. कलम 352, 351/2, 351/3, आणि 3(5) अंतर्गत अदखलपात्र गुन्हा दाखल करण्यात आला आहे.